Wêreld Kankerdag 2026: Verenig deur Uniekheid – Elke Kankerervaring Maak Saak
27 Januarie 2026 – Hierdie Wêreld Kankerdag doen die Kankervereniging van Suid-Afrika (KANSA) ‘n beroep op Suid-Afrikaners om ‘Verenig deur Uniekheid’ te staan, en erken dat elke kankerervaring diep persoonlik is – en dat mensgesentreerde sorg lewens kan red, waardigheid kan herstel en hoop kan gee.
Nou in sy tweede jaar, beklemtoon die Union for International Cancer Control (UICC) se wêreldwye ‘United by Unique’-veldtog die belangrikheid daarvan om die persoon agter die diagnose te sien en op hul individuele behoeftes, omstandighede en lewenservarings te reageer.
Vir kankeroorwinnaar Leonore het ‘n roetine welstandsondersoek haar lewe vir altyd verander. “In Mei verlede jaar, tydens ‘n Welstandsdag, het ‘n roetine-ondersoek ‘n knop opgespoor wat tot ‘n kankerdiagnose gelei het. Wat gevolg het, was een van die moeilikste tye wat ek nog ooit in my lewe ervaar het,” sê Leonore.
“Danksy KANSA se verpleegster is ek vinnig na ‘n kliniek verwys vir verdere evaluering en behandeling. Buiten die verwysing was KANSA vir my ‘n baken van hoop en krag. Dit is nie net die dienste wat hul lewer nie, maar die kultuur van ondersteuning en solidariteit wat jou werklik dra.”
Haar verhaal weerspieël die werklike impak van vroeë opsporing, tydige verwysing en deernisvolle ondersteuning – hoekstene van KANSA se werk vir byna ‘n eeu.
Kanker in Suid-Afrika: Die Dringende Werklikheid
Volgens KANSA staar Suid-Afrika ‘n vinnig groeiende kankerlas in die gesig.
“Met ‘n bevolking van ongeveer 60 miljoen mense, word die voorkoms van kanker in Suid-Afrika voorspel om teen 2030 te verdubbel, met ‘n geskatte 220 000 nuwe gevalle,” sê Lorraine Govender, KANSA Nasionale Bestuurder: Gesondheidsprogramme.
“Hierdie toename word aangedryf deur bevolkingsgroei, veroudering en stygende ouderdomspesifieke kankersyfers. Om kankeruitkomste te verbeter, moet gesondheidsorg mensgesentreerd wees – sensitief vir pasiënte se persepsies, lewensrealiteite en inligtingsbehoeftes. Hierdie benadering verbeter welstand, versterk vertroue, bevorder gesondheidsgelykheid en lei tot beter gehalte sorg.”
Hoe Suid-Afrikaners Betrokke kan Raak
KANSA moedig almal aan wat vra, ‘Wat kan ek doen?’ om hierdie Wêreld Kankerdag op te tree deur jou kankerverhaal te deel ,hetsy as oorwinnaar, versorger, geliefde of gesondheidswerker – deur skryfwerk, kuns of video.
“Dit sou wonderlik wees om baie Suid-Afrikaanse stemme op hierdie wêreldverhoog verteenwoordig te sien,” sê KANSA. Deur na werklike ervarings te luister en met deernis te reageer, kan Suid-Afrika nader beweeg aan ‘n toekoms waar kankerbehandeling nie net klinies effektief is nie, maar werklik mensgedrewe is.
Ander maniere om betrokke te raak, is om deel te neem deur gratis geborgde kankersifting-dienste wat deur KANSA aangebied word, in geselekteerde gebiede te gebruik. Of woon aktiwiteite by wat van laat Januarie tot einde Maart 2026 plaasvind. Hierdie sluit in pretlope, CANSA Relay For Life-geleenthede en ondersteuningsgroepvergaderings.
95 Jaar van Omgee: KANSA se Nalatenskap van Hoop
In 2026 vier KANSA sy 95ste bestaansjaar, wat byna ‘n eeu van diens sedert sy stigting in 1931 aandui. Van ‘n nederige begin het KANSA gegroei tot een van Suid-Afrika se voorste kankerorganisasies – moontlik gemaak deur vennootskappe, donasies en die onwrikbare toewyding van personeel en vrywilligers.
Om openlik oor kanker te praat red lewens. Om hoop en waardigheid te bied, bly die kern van KANSA se missie – want kanker definieer nie ‘n mens nie, en niemand behoort dit alleen te trotseer nie.
**Percept-report-on-the-Cost-of-Cancer-in-South-Africa-v1.pdf.
(Vir meer inligting, kontak asseblief Lucy Balona, Hoof: Bemarking en Kommunikasie by KANSA by epos lbalona@cansa.org.za Skakel 011 616 7662 of selfoon 082 459 5230).
Navrae KANSA
0800 22 6622 Tolvry
072 197 9305 Engels en Afrikaans (slegs teks)
071 867 3530 isiXhosa, isiZulu, Sesotho, Setswana and Sepe (slegs teks)
KANSA Versorgsentrums
Maak kontak met KANSA op sosiale media platforms:
