Palliatiewe Sorg Verbeter Lewenskwaliteit vir Kinders Met Kanker
“Palliatiewe sorg is nie net vir diegene wie aan die einde van hulle lewens is nie,” sê Anina Meiring, Nasionale Bestuurder: Kankerdienste vir Kinders by die Kankervereniging van Suid-Afrika (KANSA). September is Kinderkanker-maand en KANSA beklemtoon die belangrikheid van palliatiewe sorg en hoe dit beide kinders met kanker en hulle families en versorgers kan help.
#CANSACares #CANSATLC #CANSAPalliativeCare
In plaas daarvan dat dit as die laaste uitweg gesien word, gaan dit eintlik daaroor dat kinders en adolessente so gemaklik as moontlik vir so lank as moontlik kan lewe,” voeg Meiring by, aangaande palliatiewe sorg vir kinders met kanker.
Kinderkanker bly ’n groot gesondheidsuitdaging in Suid-Afrika, met omtrent 1000 kinders wat jaarliks gediagnoseer word. Alhoewel vordering in mediese navorsing die oorlewingsyfer verhoog het, moet jong kankerpasiënte steeds fisiese, emosionele en sielkundige uitdagings deurmaak. Palliatiewe sorg beoog om die beste moontlike lewenskwaliteit te verseker vir die kind of adolessent, asook vir familielede. Dit kan aan die begin van ’n diagnose begin word of enige tyd tydens die progressie van ’n lewensgevaarlike siekte, selfs al is kuratiewe behandeling geskik. Palliatiewe sorg bied belangrike ondersteuning, en fokus op die behandeling van simptome, die verligting van pyn asook holistiese sorg wat die emosionele en sosiale behoeftes van beide kinders en hulle families aanspreek.
Meiring sê, “Palliatiewe sorg vir kinders is ’n deernisvolle benadering wat KANSA van die begin van diagnose af aanmoedig. Ons bied vanaf dag een omvattende ondersteuning, en maak seker dat ons tydens hierdie periode na pasiënte se fisiese en emosionele behoeftes omsien, asook dié van hul families en versorgers.”
KANSA vat hande met Palliative Treatment for Children South Africa (PATCHSA) om meer jong kankerpasiënte te bereik wat hulp nodig het. Sue Boucher, Direkteur van PATCHSA, is ’n voorstander vir palliatiewe sorg vir kinders in Suid-Afrika.
Palliatiewe sorg vir jong kankerpasiënte word deur ’n span mense toegedien wat saamwerk. Dit kan ’n interdissiplinêre span van pediaters, onkoloë, dokters, verpleegkundiges, maatskaplike werkers, geestelike versorgers, sielkundiges, psigoterapeute, spraak- en taalterapeute, beraders, onderwysers en speelterapeute insluit.
Op die ou end word die span volgens die spesifieke behoeftes van die jongmens asook die beskikbare hulpbronne gebou. Hulle werk saam om ’n versorgingsplan te skep wat by die kind se behoeftes pas. Omdat kinders en adolessente ook die reg het om deel uit te maak van die besluit aangaande hulle gesondheid, sal die span hulle betrek en maniere vind om ingewikkelde onderwerpe in ’n taal wat hulle verstaan te verduidelik.
Meiring sê wanneer ouers en voogde palliatiewe sorg verstaan, kan hulle voorspraak maak vir hul kinders se behoeftes, ingeligte besluite neem en ook toegang tot omvattende ondersteuning kry. Hierdie kennis stel hulle in staat om die beste moontlike sorg vir hul kinders te kry, wat beide die kinders en die families se lewenskwaliteit tydens ’n moeilike tyd verbeter.
Deur hulle Tough Living with Cancer (TLC)-program, hanteer KANSA die bestuur van palliatiewe sorg, en bied hulle ook ondersteuning in die vorm van verblyf vir ouers en voogde van kinders wat kankerbehandeling kry, veral diegene wat ver van die behandelingsentrums af bly. Ander dienste sluit een-tot-een-, groepstrauma-, droefheidsberading en -ondersteuning in; ’n Facebook-ondersteuningsgroep vir ouers, voogde en versorgers; toegang tot benodighede soos rolstoele; kospakkies, toiletware, prostetiese ondersteuning, en kunsvlyt-aktiwiteite; opvoedkundige- en bewusmakingsprogramme aangaande vroeë diagnose en behandelingsresultate; en gratis Tele-berading in sewe tale vir ouers, voogde, pasiënte en versorgers.
“Ons verstaan dat dit baie moeilik is vir beide kinders en hulle ondersteuners om ’n ernstige siekte in die gesig te staar,” sê Meiring. “Ons span bied emosionele ondersteuning deur middel van ’n deernisvolle teenwoordigheid in sekere hospitale en in ons TLC-wonings, en help kinders om uiting te gee aan hul gevoelens, vrese en dit waarop hulle hoop.”
Volgens die ma’s van twee jong kankerpasiënte het die rolstoele wat die KANSA TLC-program vir hulle gegee het, ’n groot verskil gemaak. “Na sy operasie kon ons seun nie loop nie. Ons was so bly toe die stoel opgedaag het. Dit het ons in staat gestel om hom oral te neem, insluitend na die strand, parke en winkels. Dit het ook baie met hospitaalbesoeke gehelp,” sê een ouer.
Die ander ma het TLC bedank vir die rolstoel en loopring wat hulle aan hul seun verskaf het. “Dit het ons baie gehelp met hospitaal- en kliniekbesoeke en ook wanneer ons kerk toe gegaan het,” sê sy. “As dit nie vir KANSA TLC was nie, weet ek nie hoe ek dinge sou hanteer nie. Dankie dat julle altyd daar is en voortgaan om daar te wees vir ons vegtertjies. Julle maak dit soveel makliker vir ons as ouers en ons kinders.”
Vind meer uit oor palliatiewe sorg vir kinders en adolessente by cansa.org.za en www.patchsa.org. Beide het ’n lys van palliatiewe sorg-dienste en hulle kontakbesonderhede.
(Vir meer inligting, kontak asseblief vir Lucy Balona, Hoof: Bemarking en Kommunikasie by KANSA per e-pos lbalona@cansa.org.za. Skakel 011 616 7662 of op haar selfoon 082 459 5230.)
Navrae KANSA
0800 22 6622 Tolvry
072 197 9305 Engels en Afrikaans (slegs teks)
071 867 3530 isiXhosa, isiZulu, Sesotho, Setswana and Sepe (slegs teks)
KANSA Versorgsentrums
Maak kontak met KANSA op sosiale media platforms:
