Vreeslose Hare Wys Jou Omgee: KANSA Shavathon 2025 Word Op 1 Maart Bekendgestel
Die Kankervereniging van Suid-Afrika (KANSA) is opgewonde om die 23ste jaarlikse KANSA Shavathon aan te kondig, wat op Saterdag, 1 Maart 2025 by uitgesoekte winkelsentrums regoor die land bekendgestel word. Die Shavathon sal regdeur Maart voortgaan met gemeenskaps– en werkplekgeleenthede om Suid-Afrikaners bymekaar te bring in ‘n gewaagde blyk van solidariteit met diegene wat deur kanker geraak word.
#CANSAShavathon, #CANSACares, #CANSACareAndSupport, #FightingCancerTogether, #FearlessHairToShowYouCare
‘Fearless Hair to Show You Care’ is die tema vir vanjaar se geleentheid, wat ons herinner aan die moed wat kankeroorwinnaars op hul reis toon. Vir meer as twee dekades bied Shavathon ‘n platform vir gemeenskappe om te verenig ter ondersteuning van kankeroorwinnaars. Om hare te verloor is ‘n algemene newe-effek van kankerbehandeling, en die skeer of spuit van hare in helder kleure het ‘n kragtige simbool van ondersteuning en bewusmaking geword.
KANSA Shavathon bied aan individue, werkplekke en gemeenskapsgroepe ‘n geleentheid om ‘n verskil te maak. Anita Snyders, Nasionale Volhoubaarheidsbestuurder by KANSA, sê: “Shavathon bied ‘n wonderlike geleentheid vir organisasies om prettige geleenthede te hou wat spanbou en vrywilligerswerk aanmoedig, terwyl dit ook die ernstige sleutelboodskappe oor kanker oordra.”
‘n Persoonlike verhaal van ondersteuning
Mandy Nel, ‘n Shavathon-ondersteuner, deel haar diep persoonlike verbintenis met die saak: “Kanker het my lewe op soveel maniere beïnvloed. Alhoewel ek nie self kanker gehad het nie, het ek familielede aan die siekte verloor en die veerkragtigheid van oorwinnaars gesien. Die ondersteuning van die KANSA Shavathon herinner my daaraan dat diegene wat nog deur hierdie kankerervaring gaan en diegene wat ons verloor het, nooit vergeet word nie. Dit is ‘n manier om omgee te toon en mense te herinner dat hulle nie alleen is in hierdie saak nie.”
Hoe om deel te neem aan KANSA Shavathon 2025
Sluit aan by KANSA se Shavathon by geselekteerde winkelsentrums op Saterdag, 1 Maart 2025 (sommige geleenthede vind op Sondag, 2 Maart plaas – kyk na die geleentheidsgids op die KANSA Shavathon webwerf vir besonderhede). Skeer of spuit jou hare in solidariteit met kankeroorwinnaars. Haarskenkings sal ook aanvaar word om pruike vir kankerpasiënte te maak.
Donasiefooie is R50 per volwassene en R25 per kind jonger as 12 jaar. Beperkte uitgawe KANSA hoofbedekkings en sakke sal verkoop word (solank voorraad hou) en sertifikate van waardering sal gegee word aan diegene wat haarskenkings van 25 cm of langer maak (korter lengtes sal ook aanvaar word aangesien dit as vullers in pruike gebruik word).
“Hoewel KANSA geleenthede by minder winkelsentrums sal aanbied, kan jy by ‘n Shavathon-geleentheid in jou gemeenskap aansluit of jou eie aanbied as jy nie ‘n winkelsentrum Shavathon kon bywoon nie,” voeg Snyders by.
Fondse wat tydens die KANSA Shavathon ingesamel word, sal gebruik word vir die verskaffing van noodsaaklike sorg- en ondersteuningsdienste aan kankerpasiënte, versorgers en geliefdes. KANSA bied ‘n wye reeks dienste, insluitend berading, tuisversorging, pruike, borsprosteses, huur van mediese toerusting en voorspraak vir verbeterde kankersorg in Suid-Afrika. Daarbenewens gaan fondse na opwip-klinieke om kankersifting, lewenstylrisikobepalings en opvoedkundige kankerbewustheid uit te voer.
Gemeenskapsgroepe wat dalk ‘n Shavathon-geleentheid wil aanbied, sluit in skole (kleuterskole, laerskole, hoërskole), tersiêre instellings (kolleges, universiteite, ens.), organisasies (kerke, klubs, ens.) en individue (vriende, familie, ens.).
Vir geleenthede met meer as 50 mense kan die publiek hul plaaslike KANSA Sorgsentrum kontak en met die KANSA Volhoubaarheidspersoneelvennoot praat. Die personeelvennoot en vrywilligers sal die geleentheid bywoon en skeerapparate, voorskote, stensils, haarspuitverf en ‘n plakkaat verskaf om dit te adverteer. Na afloop van die geleentheid sal oorskiet spuitverf en ander Shavathon-voorraad aan die KANSA Sorgsentrum terugbesorg word.
Vir geleenthede met minder as 50 mense kan die publiek hul Shavathon-geleentheid op hul eie aanbied. Die KANSA Volhoubaarheid-personeelvennoot sal ‘n Shavathon stel voorberei met die produkte wat nodig is vir hul geleentheid. Al wat hulle daarna doen, is om die oorblywende spuitverf en fondse wat ingesamel is, aan die KANSA Sorgsentrum terug te gee. Nog ‘n opsie is om die geleentheid te registreer en Shavathon-voorraad deur die KANSA eShop te koop. Na afloop van die geleentheid moet fondse wat ingesamel word aan KANSA oorgeplaas word volgens die bankbesonderhede op KANSA eShop-faktuur en enige oorblywende Shavathon-produkte kan deur die organiseerder gehou word vir ‘n volgende geleentheid.
Tradisioneel word werkplekke aangemoedig om ‘n Shavathon-geleentheid van Maandag 3 Maart 2025 tot 31 Maart 2025 aan te bied, maar werkplekke kan nou enige tyd gedurende die jaar ‘n geleentheid aanbied.
Werkplekke kan óf hul geleentheid registreer en Shavathon-voorraad deur die KANSA eShop koop en die Shavathon-produkte wat na die geleentheid oorbly hou vir ‘n volgende geleentheid. Die fondse wat ingesamel word, moet aan KANSA oorgeplaas word volgens die bankbesonderhede op KANSA eShop-faktuur. Alternatiewelik kan werkplekke hul plaaslike KANSA Sorgsentrum kontak en met die KANSA Volhoubaarheidspersoneelvennoot praat. Die personeelvennoot en vrywilligers sal die geleentheid bywoon en skeerapparate, voorskote, stensils, haarspuitverf en ‘n plakkaat verskaf om dit te adverteer. Na afloop van die geleentheid moet die fondse wat ingesamel is, oorblywende spuitverf en ander Shavathon-voorraad aan die KANSA Sorgsentrum terugbesorg word.
Word ‘n fondsinsamelingskampioen
KANSA doen ‘n beroep op fondsinsamelingskampioene om aanlyn fondse in te samel en pryse te wen. Stel ‘n aanlyn fondsinsamelingsprojek op via GivenGain en motiveer jou netwerk om te skenk. Elke bydrae help KANSA om opvoeding, siftingsinisiatiewe, sorg- en ondersteuningsdienste te verskaf aan diegene wat deur kanker geraak word.
Om hare kleurvol te spuit of ‘n ‘borgtogfooi’ te betaal is alternatiewe vir diegene wat kies om nie te skeer nie of dit nie op die dag kan doen nie. Shavathon verwelkom ook vrywilligers wat dit geniet om ‘n aktiewe rol te speel om ‘n verskil te maak – hul ondersteuning is van onskatbare waarde.
Vir meer inligting oor alle KANSA Shavathon-verwante aktiwiteite, besoek https://shavathon.org.za/.
Vir meer inligting, kontak asseblief vir Lucy Balona, Hoof: Bemarking en Kommunikasie by KANSA per e pos lbalona@cansa.org.za. Skakel 011 616 7662 of op haar selfoon 082 459 5230.)
Navrae KANSA
0800 22 6622 Tolvry
072 197 9305 Engels en Afrikaans (slegs teks)
071 867 3530 isiXhosa, isiZulu, Sesotho, Setswana and Sepe (slegs teks)
KANSA Versorgsentrums
Maak kontak met KANSA op sosiale media platforms:
